مصطفى بكري منفعلا على الحكومة: بالراحة شوية على الغلابة «فيديو»

أكد الإعلامي مصطفى بكري، أن هناك مؤامرة تحاك ضد مصر من كافة الاتجاهات، مردفًا «هناك أبواق تهاجم الجيش والرئيس السيسي، وأنا أقول لمن يهاجم، تعال ورينا نفسك وامسك الحكم هتعمل إيه، تعال ورينا هتعمل إيه في ظل التحديات الراهنة، هو في حاكم عاوز يكون شعبه ناقم عليه، لا والله مفيش رئيس عاوز يكون شعبه ناقم».

وأضاف مصطفى بكري خلال تقديم برنامجه «حقائق وأسرار» المذاع على قناة «صدى البلد»، مساء اليوم الجمعة، «أوعى تنسى اللي عمله الرئيس السيسي علشان البلد دي، أوعى تفتكر اللي بيتعمل للرئيس السيسي، لا، هذا للشعب المصري، الرئيس السيسي يعمل للشعب والمواطن، قد يكون الوضع صعب، لكن لا بد من الوقوف مع الرئيس السيسي».

وتابع مصطفى بكري: «كلنا عارفين الظروف الاقتصادية وعارفين الغلابة وعارفين الطبقة المتوسطة واللي بتعاني منه، بطلب من الحكومة تدير الملفات بشكل صح، انت عاوز تغلي كل حاجة، عاوز ترفع أسعار الكهرباء في وقت واحد، بالراحة بالراحة يا عم، الشعب دا متحمل كتير، انتوا بتعملوا ربكة في البلد».

وأكمل مصطفى بكري: «الشعب دا صابر ومتحمل ولولا ثقته في القائد ما كانت الدنيا هتبقى حلوة ولا مستمرة، الرئيس السيسي عارف إن البلد مستهدفة واللي عايزين الدنيا تولع قاعدين في لندن بجوازات سفر أجنبية، أنا بتكلم كلام من قلبي، ولازم يكون في وعي وإدارة مختلفة لإدارة الأمور، ومعاقبة المخطئ».

وأشار مصطفى بكري إلى أن مصر تحتاج خطة شاملة لحل الأزمات، معقبًا: «الواقع صعب اللي إحنا عايشينه مخلي الأمور كدا، سوء الإدارة وعدم حل الأزمات بيخلي الناس تضايق، مصر ترفض نهائيا تهجير الفلسطينيين، مصر من الدول القليلة في العالم التي لم تدين المقاومة الفلسطينية بعد عملية طوفان الأقصى».