رد الفنان حسام حبيب حول الجدل الدائر عن علاقته السابقة بالفنانة شيرين عبد الوهاب، وعن تصنيفها بين الجمهور بأنها من أشهر العلاقات السامة، قائلًا: «للأسف تصرفات شيرين وقت غضبها، جعلت الناس تقول إن العلاقة توكسيك، لكن هذا ليس حقيقي، والست عندما تغضب مينفعش تحاسبها».
وأضاف حبيب خلال لقائه مع الإعلامية منى عبد الوهاب في برنامج «ع المسرح»: «ارتباطي بشيرين ارتباط صداقة ومن مميزات شيرين إني بحس أنها صاحبي الولد، مش زي البنات، يعني مبتتكلمش في المواضيع اللي البنات اللي بيتكلموا فيها مبتنمش على حد مبتحسبهاش حسابات البنات».
واستطرد: «شيرين أول بني آدمه اتجوزها وأعيش معاها، أنا عمري ما عيشت برا بيت أهلي طول عمري عايش مع أمي وأختي بعدها رحت على العيشة مع شيرين، شيرين مكانش في بيني وبينها معاملة الزوج والزوجة إحنا دايمًا كنا عايشين أصدقاء».
ووجهت منى عبد الوهاب سؤالا للفنان حسام حبيب: «الناس كانت مستكترة شيرين عليك؟» فرد قائلا: «ممكن الناس كانت مستكترة شيرين عليا لأن حسابات الناس حسابات دنيوية جدًا، واحدة مكان شيرين كانت ممكن تقول هروح أتجوز واحد غني ولا أتجوز واحد أكبر مني في السن يستوعبني، لكن أنا في نفس سنها تقريبًا وأصحاب كأننا اتنين ولاد قاعدين مع بعض، لكن شيرين شخص بسيط جدًا وبتاخد سعادتها من حاجات بسيطة جدًا».
