تحدث علاء إبراهيم المدير الفني لفريق ديروط مساء اليوم الثلاثاء، عقب فوز فريقه على نظيره كهرباء الإسماعيلية في إطار منافسات مسابقة دوري المحترفين موسم 2024-25.
قال علاء إبراهيم في تصريحات لشبكة قنوات «أون تايم سبورتس»، عقب انتهاء مباراة ديروط وكهرباء الإسماعيلية: «الحمدلله فضل ونعمة من ربنا سبحانه وتعالى، وده بسبب توفيق ربنا».
وأضاف: «إحنا بنعمل تجربة فريدة من نوعها، أنت لو بصيت للفرقة انهاردة، هتلاقي في لاعيبة مواليد 2003 و2004 و2005، وأول مرة يلعبوا دوري المحترفين».
وتابع علاء إبراهيم: «هما دول الناشئين بتوعنا الأقوياء، ولذلك صعدناهم وفي 5 كمان طلعوا الدوري الممتاز، وربنا وفقنا وقدرنا نصعد إلى دوري المحترفين».
وأكمل: «الحمدلله الخامات كويسة وعندنا لاعيبة كبيرة بس سن صغير، وكنت محتاج الماتش ده جدًا وكنت مركز فيه للثقة، عشان اللاعيبة كانت خايفة وهما عندهم أحسن من كدة كمان».
وواصل: «والدوري صعب وإن شاء الله نفرز لاعيبة للدوري الممتاز مش سيراميكا بس، وطموحنا ملوش حدود، أنا مش عايز أصعد دوري ممتاز أنا عايز أروح كأس العالم للأندية».
وأتم: «وده طموحي الشخصي ووصلته للاعيبة، لكن الهدف إننا بنعمل تجربة فريدة من نوعها، ونفرز لاعيبة كويسة وتعمل نتائج كويسة عن طريق الاحتكاك في دوري المحترفين».
وفاز فريق ديروط بقيادة علاء إبراهيم مساء اليوم الثلاثاء، على مضيفه كهربا الإسماعيلية بقيادة ياسر الكناني، بهدفين مقابل هدف، ضمن منافسات الجولة الأولى من مباريات دوري المحترفين اليوم الثلاثاء.
