فجر المؤلف محمد الشواف، مؤلف مسلسل حكيم باشا، مفاجأة من العيار الثقيل، حينما أعلن تعرضه للابتزاز من أشخاص مجهولين يطلبون منه مبلغا كبيرا من المال من أجل الترويج لمسلسله، وإلا سينقلب الحال عليه ويتم مهاجمته وانتقاده بشدة.
وكتب الشواف عبر حسابه بموقع فيسبوك: “أنا آسف حقيقي إني أكتب الكلام ده بس بقالي يومين تلاتة بيجي لي تليفونات غريبة ومريبة من ناس وأرقام بتظهر على ترو كولر باسم “الشبح” و”عرب” وغيرها، بيعرضوا عليَ إنهم يعملوا حملات دعم لمسلسل “حكيم باشا” وإنهم يدعموا المسلسل على السوشيال ميديا مقابل 50 ألف جنيه لمدة أسبوع، وقالوا لي على سعر التريند على منصة إكس، وإن اسمي يتبروز، وصفحات تتكلم عني باعتباري أجمد سيناريست في مصر”.
وتابع، “اللي يعرفني عارف كويس إني لا بتاع زيطة ولا منظرة ولا بتكلم عن شغلي ولا بشكر في حاجة عملتها، وبتقبل أي رأي سلبي قبل إيجابي عن حاجة بعملها، رفضت بأدب العرض لأني شايفه رخيص، فكان الرد إنهم هيخلوا صحفيين معروفين يهاجموا السيناريو وكاتب السيناريو بتاع مسلس حكيم باشا، لو ما دفعتش بالتي هي أحس”.
وواصل، “واتقال لي نصا ده أكل عيشنا واللي معانا أسامي كبيرة وهيخلوك مسخرة فيسبوك وتيك توك وإكس”، فاقترحت عليهم “يعملوا على إنستجرام كمان عشان يكملوا “الباكدج”، ولو إني متأكد إن مفيش صحفي محترم ممكن يعمل كده”.
وأردف: “بعيدا بقى عن إن مفيش إجماع على أي عمل في الدنيا من صنع البشر فطبيعي ناس تحب “حكيم باشا” وناس تشوفه عادي وناس تكرهه وناس تشوفه دون المستوى، لولا اختلاف الآراء كنا جميعا نقعد في البيت، إحنا بنجتهد ويكفيني لو شخص واحد بس عجبه رسالة المسلسل، لكن أبدا مش هدفع فلوس عشان أقول إني جامد، لأني ما أجيش حاجة جنب الأساتذة الكبار زمايلي اللي ليهم شغل قدي 10 مرات، فمش محتاج أناطح حد وأقول شغلي أهو عشان ده رخص، ولا هدفع لمأجورين عشان يشكروا في، ولو حد منهم طلع قال عني إني أسوأ سيناريست فأنا مقدر حجم ألمه من ضياع سبوبته والقرش الحرام اللي مستنيه مني”.
واختتم كلامه، “أنا آسف لكل اللي هيكتب كلمتين وحشين في حقي شخصيا، وآسف لكل حد مش عاجبه المسلسل، بوعدك أعمل مجهود أكبر السنة الجاية، وأسف لأي حد طالب مني تصريحات لمكانه المحترم لأني حقيقي مش بحب اتكلم عن شغلي، فيه أساتذة كبار قيّموا “حكيم باشا” من أول يوم وكلامهم فوق راسي، وناس كتير انتقدوا حاجات في حكيم برضه ورأيهم فوق دماغي، لكن اللي عاوز فلوس عشان يقول كلمتين في حقي أرجوك تكمل حملاتك ضدي بكل قوة وتكتب أسوأ ما في المسلسل عشان أتعلم منك، واعتذرلكم جميعا أني ضيعت عليكم سبوبة، وأظن أساتذتي المحترمين اللي ليهم أعمال برضه مش هيقبلوا “يعرقوكم” عشان تكتبوا كلام حلو عنهم”.
يذكر أن مسلسل حكيم باشا بطولة مصطفى شعبان، دينا فؤاد، وسهر الصايغ، رياض الخولي، سلوى خطاب، منذر رياحنة، أحمد فؤاد سليم، سلوى عثمان، فتوح أحمد محمد نجاتي، ميدو عادل، والعمل من تأليف محمد الشواف، وإخراج أحمد خالد أمين.
