إيران على بعد أيام من السلاح النووي؟! وترامب بيهدد باغتيال المرشد علنًا لأول مرة في التاريخ!

اللي بيحصل دلوقتي بين إيران والكيان مش مجرد توتر عادي… إحنا داخلين على لحظة فاصلة ممكن تغير شكل العالم كله!
إيران حاليًا عندها حوالي 500 كجم من اليورانيوم المخصب بنسبة 60%، والرقم ده يخوّف، لإن بحسب كلام خبراء كبار زي الدكتور يسري أبو شادي (مفتش سابق في وكالة الطاقة الذرية) الكمية دي ممكن تتحول بسهولة لـ 10 قنابل نووية!
يعني إيران دلوقتي مش مستنية سنين… دي محتاجة كام يوم شغل في مفاعل “فوردو” اللي فشلت إسرائيل في تدميره، وخلاص تبقى دولة نووية فعلًا.
وإيه اللي حصل امبارح؟
ضربة صاروخية إيرانية استهدفت مجمع استخبارات في هرتسيليا تابع للجيش الإسرائيلي. الصواريخ دي – من النوع الجديد اللي إيران أعلنت عنه – نجحت في اختراق منظومة دفاع باتريوت ووصلت لهدفها، وسقط فيها ضباط من الموساد وجهاز أمان حسب وكالة تسنيم الإيرانية.
الإعلام الإسرائيلي؟
ساكت تمامًا، لا نفى ولا اعتراف، لكن فيديوهات الضربة انتشرت على تويتر – أو X – بشكل واسع، والإيرانيين بيقولوا: دي بداية مرحلة “مفيهاش خطوط حمراء”!
مش بس كده…
في تل أبيب نفسها، استهداف لمخزن لوجستي تابع للاستخبارات العسكرية، والضربة دي فيه كلام إنها كانت هجمة إلكترونية مش صاروخية… وده يتماشى مع التقارير اللي بتقول إن الهجمات السيبرانية ضد البنية التحتية الإسرائيلية زادت بنسبة 700% من يوم 13 يونيو، ومجموعة هاكرز اسمهم “هندالة” أعلنوا إنهم سرقوا 2 تيرابايت بيانات من شركات حساسة.
طيب أمريكا واقفة تتفرج؟!
لأ خالص… أمريكا خلاص دخلت على خط النار:
• أكتر من 17 طيارة تزود بالوقود وطائرات F-35 وF-16 اتحركوا على وضع استعداد عملياتي.
• حاملة الطائرات “نيميتز” في طريقها للمنطقة.
• ووزير الدفاع الأمريكي بنفسه أعلن استعداد بلاده لدخول مواجهة مفتوحة لو اتضربت قواعد أمريكية أو إسرائيل طلبت تدخل مباشر.
إنما المفاجأة الكبيرة…
ترامب بنفسه طلع وقال إن إيران “قريبة جدًا من القنبلة النووية”، واتهم المخابرات الأمريكية بالتقصير، وهدد المرشد الإيراني علنًا وقال “عارف هو فين، وآمن مؤقتًا”.
ودي أول مرة رئيس أمريكي يهدد قائد أعلى لدولة بالاغتيال بالشكل ده، وده معناه إن أمريكا نفسها خلاص دخلت المعركة رسميًا!
ربنا يستر ..حفظ الله مصر