كان حدانا في البلد …

أي زوجه تقول لأخو زوجها يا عمي حتى لو أصغر منها ب 20 سنه , و أخت الزوج اسمها عمّه , ده لا قهر ولا استعباد , دي موده ومحبه .
كان حدانا في البلد …
أي راجل بشنب ملو هدومه يقول لأي ست أكبر منه يا خاله حتى لو ماتقربلهوش خاله فلانه , لو كان عندها ألف فدان يقول لها يا خاله , ولو بتبيع جرجير قدام الجامع يقول لها يا خاله .
كان حدانا في البلد …
العم بيتقال له أبوك فلان , روح هات كذا من بيت أبوك فلان , اللي هو عمك , و الجد بيتقال له سيدي فلان و أي راجل عجوز بيتقال له يا سيدي
كان حدانا في البلد …
الإبن حتى لو كان أستاذ في الجامعه يبوس إيد أبوه و أمه و عمه الكبير و خالته الكبيره , يوطي و يبوس ضهر إيدهم مش يبوس خدهم .
كان حدانا في البلد …
لو حد تعب البلد تتقلب , ولو حد مات كله يعزي و يجهز أكل للضيوف اللي جايين يعزو من بره البلد ( كل بيت يجهز أكل ) , و في الفرح كله يحضر من غير كارت دعوه , من غير قاعه , البلد بتبقى هي القاعه .
كان حدانا في البلد …
ناس بتصحى من الفجر تركّب العده عالحمار و تعلّقه في العربيه الكار و تربط البهايم في العربيه من ورا و صوت ماكينات الري يظهر مع صياح الديوك , و أرض عطشانه بتشرب و عصافير بتسبح ربنا .
كان حدانا في البلد …
لو ماشي وشايل حاجه بتتاكل جايبها من الارض لازم تعزم عالناس اللي بتقابلك , خد لك شوية بصل أخضر لسه بطينهم أهم , خدي لك كرنبه يا خاله .
كان حدانا في البلد …
ناس بتنام بعد العشا , إيديهم خشنه و مشققه , بينامو مهدودين و مبتسمين , لا سمعو عن أمراض نفسيه ولا يعرفو المنوم و لا المهدئات ولا لعنو الظروف ولا الدكتور قال لهم محتاجين تطلعو شرم أسبوع عشان تغيرو جو .
كان حدانا في البلد …
ضحكه بتطلع من القلب و كلام حلو , صباحك نادي , خلّي عنك , العوافي , من يد ما نعدمهاش .
كان حدانا في البلد …
طرنبة مايه عمرها أكبر من عمر بلاد عالخليج و شجرة عمرها أكبر من عمر أمريكا .
كان حدانا في البلد …
وشوش بتعرف تبتسم و عواجيز في ملامحهم خريطة بلد , و عيال صغيره بتاخد الحكمه والفلسفه من القاعده مع الاجداد ( لما بيقعد مع سيده ) , مش من كتب ( الخواجات ) .
كان حدانا في البلد يوم الاتنين ويوم الخميس اللي عندة لبن وزبدة وجبنة قريش يوزعهم لكل بيت من جيرانة معندهمش مواشي كان الخير والبركة كتير في كل مكان ……..
كان حدانا في البلد اللي يعمل طبيخ يبعت منة لكل بيت من بيوت الجيران طبق كنا ننام والأبواب والشبابيك مفتوحة كان فية أمان و حب وخوف علي بعضنا …….
كان حدانا في البلد …
أدب و خجل و توقير للكبير و فيها حياه , حاجات كتير اختلفت بس لسه فيها حياه , الله يخرب بيت المدنيه عالتطور على أم عوجة اللسان على بليز على ميرسي عالماكياج و الماسكات و الوشوش.
يرحم زمااان وليالي زماان